ខាងក្រោមនេះគឺជាការទស្សន៍ទាយអត្ថន័យនៃប្រជ្រុយនៅលើផ្ទៃមុខរបស់អ្នក ៖
ប្រជ្រុយនៅត្រង់ចង្កា ៖ បុរសនារីណាដែលមានប្រជ្រុយនៅត្រង់ចង្កាលុះដល់វ័យចាស់ជរាទៅនឹងជួបនូវភ័ព្វវាសនាល្អ។ ប៉ុន្តែបញ្ហាមួយគួរយកចិត្តទុកដាក់នោះគឺប្រសិនបើចង្កាមានសម្លាកស្នាមអ្វីមួយឆូតកាត់ លុះដល់វ័យចាស់ជរាទៅរាសីនឹងស្រុតចុះវិញជាពុំខានឡើយ។
ប្រជ្រុយនៅចំពាក់កណ្តាលរោមចិញ្ចើម ៖ បុរសនារីណាដែលមានប្រជ្រុយនៅចំពាក់កណ្តាលនៃរោមចិញ្ចើមជាអ្នកមានថ្វីដៃនិងសមត្ថភាព ខ្ពង់ខ្ពស់ហើយមានមិត្តភក្តិច្រើនទៀតផង។ ប្រសិនបើជួបឧបសគ្គអ្វីមួយជនប្រភេទនេះនឹងត្រូវបានមិត្តភក្តិជួយដោះស្រាយអោយរួចពីទុក្ខទោស។ ម្យ៉ាងទៀត ទោះបីជាមានសមត្ថភាពកម្រិតខ្ពស់យ៉ាងណាក្តី ក៏ពួកគេទាំងនោះមានការជួយឧបត្ថម្ភពីចៅហ្វាយនាយដោយចាំបាច់បំផុត។
ប្រជ្រុយនៅក្នុងរោមចិញ្ចើម ៖ បុរសនារីណាដែលមានប្រជ្រុយនៅក្នុងរោងចិញ្ចើមជាអ្នកសំបូរទៅដោយចំណេះវិជ្ចានិងមានសមត្ថភាពកម្រិតខ្ពស់នៅក្នុងផ្នែកសិល្បៈ ដូចនេះហើយនៅក្នុងអាជីពសិល្បៈនេះពួកគេអាចមានការរីកចំរើនទៅមុខ ល្បីល្បាញទៅអនាគត។
ប្រជ្រុយនៅខាងចុងរោមចិញ្ចើម ៖ បុរសនារីណាដែលមានប្រជ្រុយនៅត្រង់ខាងចុងរោមចិញ្ចើមជាមនុស្សមានទ្រព្យសំណាងសម្បូរហូរហៀរ ហើយកាលពីនៅយុវវ័យអាចចំណេញបានប្រាក់កាសច្រើន ហើយជនប្រភេទនេះគឺពុំខ្វះខាតប្រាក់កាសទេ ហើយក៏ពុំជួបការលំបាកវេទនាអ្វីផងដែរ។
ប្រជ្រុយនៅចន្លោះរោមចិញ្ចើមនិងភ្នែក ៖ បុរសនារីណាដែលមានប្រជ្រុយនៅត្រង់ចន្លោះនៃរោមចិញ្ចើមនិងរង្វង់ភ្នែក ជាមនុស្សមានសំណាងបំផុត ព្រោះមានចៅហ្វាយនាយជួយឧបត្ថម្ភ ម្ល៉ោះហើយគង់មានថ្ងៃណាមួយអាចចម្រុងចម្រើនជាពុំខាន។ ប្រសិនបើសាមីខ្លួនបានប្រកបមុខរបររកស៊ីតូចតាចក្តីក៏អាចមានសន្ទុះជឿនលឿនទៅមុខយ៉ាងឆាប់រហ័ស។
ប្រជ្រុយនៅចំចុងកន្ទុយភ្នែក ៖ បុរសនារីណាដែលមានប្រជ្រុយនៅត្រង់ម្តុំចុងកន្ទុយភ្នែកក៏ជាតំណាងអោយអ្នកដែលមានភ័ព្វវាសនាល្អដូចជាប្រជ្រុយនៅត្រង់ចន្លោះរោមចិញ្ចើមនិងរង្វង់ភ្នែកដែរ គឺមនុស្សប្រភេទនេះត្រូវបានអ្នកផងជួយជ្រោមជ្រែងលុះត្រាតែបានសម្រេចនូវកិច្ចការអ្វីមួយ។
ប្រជ្រុយនៅក្រោមត្របកភ្នែក ៖ បុរសនារីណាដែលមានប្រជ្រុយនៅក្រោមត្របកភ្នែកជាតំណាងនូវស្នេហ៍ច្រើន ព្រោះពួកគេតែងតែភ្លើតភ្លើនក្នុងផ្លូវស្នេហា ហើយជារឿយៗក៏រងនូវទឹកភ្នែកជូតក្បាលជង្គង់ក៏ដោយសារតែរឿងស្នេហ៍អភ័ព្វនេះដែរ។ ចំពោះនារីភេទវិញ លុះទទួលការរំភើបចិត្តរួចហើយ ទើបអាចដោះស្រាយបានតាមក្រោយ ម្ល៉ោះហើយបុរសស្ត្រីណាដែលមានប្រជ្រុយបែបនេះ មុននឹងទាក់ទងពីរឿងស្នេហា គួរតែដើរសន្សឹមៗបានហើយ ដាច់ខាតកុំអោយធ្លាក់ចូលក្នុងរណ្តៅស្នេហ៍អោយសោះ។
ប្រជ្រុយនៅចំពីក្រោមប្រស្រីភ្នែក ៖ បុរសនារីណាដែលមានប្រជ្រុយនៅចំពីក្រោមប្រស្រីភ្នែក អាចចាត់ទុកបានជាភ័ព្វសំណាងល្អណាស់ ព្រោះអាចនាំមកនូវជោគវាសនាល្អជាទីបំផុតសម្រាប់កូនចៅ។ ទោះបីជាសាមីខ្លួនពុំមានប្រជ្រុយបែបនេះក្តី ហើយបានទៅរៀបការជាមួយនឹងអ្នកមានប្រជ្រុយបែបនេះនោះ ក៏អាចផ្តល់នូវភ័ព្វសំណាងដ៏ល្អសម្រាប់កូនចៅដែរ។
ប្រជ្រុយនៅចំហៀងក្តោងច្រមុះ ៖ បុរសនារីណាដែលមានប្រជ្រុយនៅត្រង់ចំហៀងក្តោងច្រមុះ គឺជាមនុស្សមានទ្រព្យសំណាងពេញហូរហៀរ ហើយប្រសិនបើក្រុមហ៊ុនណាមួយបានទទួលមនុស្សប្រភេទនេះចូលធ្វើការគឺក្រុមហ៊ុននោះនឹងជួបតែការរីកចំរើនរលូនទៅមុខជាលំដាប់។
ប្រជ្រុយនៅចំពីលើស្នាមខ្សែមុខ ៖ បុរសនារីណាដែលមានប្រជ្រុយនៅចំពីលើស្នាមខ្សែមុខ លុះចូលដល់មជ្ឍិមវ័យទើបមានការរីកលូតលាស់និងចម្រុងចម្រើន។ ម្យ៉ាងទៀតកាលពីនៅកំលោះក្រមុំធ្លាប់ជួយឧបសគ្គច្រើនប៉ុន្តែប្រសិនបើខំពុះពារទីបំផុតអាចទទួលបានផ្លែផ្កាល្អជាពុំខានឡើយ។
ប្រជ្រុយនៅផ្នែកខាងលើបបូរមាត់ ៖ បុរសនារីណាដែលមានប្រជ្រុយនៅចន្លោះច្រមុះនិងបបូរមាត់ជាអ្នកមានទ្រព្យស្តុកស្តម្ភហើយមានជីវភាពប្រសើររុងរឿងទៀតផង។ រីឯស្ត្រីភេទអាចក្លាយជាចៅហ្វាយនាយទៀតផង។
ប្រជ្រុយនៅជ្រុងចង្កា ៖ បុរសនារីណាដែលមានប្រជ្រុយនៅតាមជ្រុងចង្កាគឺជាមនុស្សមានទីលំនៅរស់នៅដោយសុខសាន្តហើយក្នុងពេលនេះដែរ អាចក្លាយទៅជាអ្នកមានស្តុកស្តម្ភមានទ្រព្យសម្បត្តិហូរហៀរ។
ប្រជ្រុយនៅលើថ្ពាល់ ៖ បុរសនារីណាដែលមានប្រជ្រុយនៅលើថ្ពាល់ជាអ្នកមានចរិតរឹងប៉ឹងហើយត្រូវបានចាស់ទុំ គោរពនិងសរសើរម្ល៉ោះហើយអាចរួមរស់ដោយសុខសាន្តគ្រប់ពេលវេលា។
ប្រជ្រុយនៅលើកញ្ចឹង-ក ៖ អ្នកដែលមានប្រជ្រុយនៅលើកញ្ចឹង-ក គឺជាអ្នកមានជីវភាពធូរធារដោយពុំព្រួយបារម្ភចំពោះការខ្វះខាតឡើយ។
ប្រជ្រុយនៅត្រង់គល់ត្រចៀក ៖ អ្នកដែលមានប្រជ្រុយនៅត្រង់គល់ត្រចៀក ជាមនុស្សឆ្លាតវាងវៃ ទោះបីជាអ្នកនោះរាងទុយមុយក្តី ក៏អាចជាអ្នកមានប្រាជ្ញាភ្លឺថ្លាដែរ។
0 comments:
Post a Comment